Samtök um bíllausan lífsstíl Frá framboðsfundi Samtaka um bíllausan lífstíl sem fram fór á Kex Hostel 13. apríl.
Gísli Marteinn Baldursson var fundarstjóri á framboðsfundi Samtaka um bíllausan lífsstíl, sem fram fór á dögunum.
Samtök um bíllausan lífsstíl

Einungis eitt framboð vill halda flugvellinum í Vatnsmýri

Á flugvöllurinn að víkja fyrir byggð? Styður þitt framboð Borgarlínu eins og áætlanir um hana líta út í dag? Á Reykjavíkurborg að beita sér fyrir því að bílaumferð minnki innan borgarmarkanna? Á að fækka bílastæðum í miðborginni? Svörin við þessum spurningum og fleirum voru kreist fram úr frambjóðendum í borginni á dögunum, á fundi Samtaka um bíllausan lífsstíl.

Þetta er fremur ein­föld spurn­ing. Viljið þið að í Vatns­mýr­inni sé byggð eða viljið þið að í Vatns­mýr­inni sé flug­völl­ur?“ spurði Gísli Mart­einn Bald­urs­son full­trúa fram­boða sem bjóða fram í Reykja­vík á fram­boðs­fundi sem Sam­tök um bíl­lausan lífs­stíl stóðu fyrir fyrr í mán­uð­in­um.

Allir full­trúar flokk­anna sem voru á fund­in­um, nema Ómar Már Jóns­son odd­viti Mið­flokks­ins, sögðu að þau vildu sjá byggð í Vatns­mýr­inni fremur en flug­völl. Það voru þó fyr­ir­varar hjá sum­um. „Ef við finnum nýjan stað fyrir hann er frá­bært að byggja í Vatns­mýr­inn­i,“ sagði Einar Þor­steins­son odd­viti Fram­sókn­ar­flokks­ins.

Ein­ungis átta ár eru liðin frá því að Fram­sókn­ar­flokk­ur­inn bauð fram í Reykja­vík undir merkjum Fram­sóknar og flug­vall­ar­vina og í síð­ustu kosn­ingum var það eitt af helstu stefnu­málum flokks­ins að flug­völl­ur­inn yrði áfram í Vatns­mýri.

Hildur Björns­dóttir odd­viti Sjálf­stæð­is­flokks­ins sló einnig fram sama fyr­ir­var­an­um. Ef nýr staður verði fund­inn fyrir flug­völl ætti að byggja í Vatns­mýr­inni.

Níu fram­boð í pall­borði og leið­togar þess tíunda í salnum

Full­trúar níu flokka tóku þátt í fund­in­um, sem fjall­aði um það hvað fram­boðin í borg­inni vildu gera fyrir fjöl­breyti­legar sam­göngur í Reykja­vík. Full­trúar tíunda fram­boðs­ins af þeim alls ell­efu sem bjóða fram í borg­inni, sem heitir Reykja­vík, besta borgin, gerð­ust svo einnig þátt­tak­endur í fund­inum með spurn­ingum og athuga­semdum úr sal.

Í stafni þess fram­boðs standa Gunnar H. Gunn­ars­son og Örn Sig­urðs­son, en þeir hafa verið meðal helstu tals­manna hjá Sam­tökum um betri byggð um langt skeið. Þau sam­tök hafa meðal ann­ars talað fyrir því að flug­völl­ur­inn víki sem allra fyrst úr Vatns­mýri og þar bygg­ist upp þétt borg­ar­byggð og hafa lengi átalið borg­ar­yf­ir­völd fyrir að beita sér ekki harðar fyrir því að flug­vell­inum verði lok­að.

Öll nema Kol­brún og Sanna vilja fækka bíla­stæðum í mið­borg­inni

Á fund­in­um, sem fram fór á Kex Hostel þann 13. apr­íl, létu gestir og fund­ar­stjór­inn Gísli Mart­einn spurn­ingar dynja á fram­bjóð­end­un­um. Bíla­stæði í mið­borg­inni komu til tals eftir spurn­ingu úr sal. „Hverjir vilja fækka stæðum í mið­borg­inn­i?“ spurði fund­ar­stjór­inn – og átti þar ekki ein­ungis við bíla­stæði á yfir­borði jarðar heldur heild­ar­fjölda bíla­stæða í mið­borg­inni.

Hvað ætla flokk­arnir í borg­ar­stjórn að gera fyrir fjöl­breyti­legar sam­göng­ur?

Hvað ætla flokk­arnir í borg­ar­stjórn að gera fyrir fjöl­breyti­legar sam­göng­ur?

Posted by Sam­tök um bíl­lausan lífs­stíl on Wed­nes­day, April 13, 2022

Fram­bjóð­end­urnir voru með spjöld með grænum karli og rauðum karli og þýddi grænn karl í þessu til­viki að fram­bjóð­endur vildu fækka stæðum í mið­borg­inni, en rauður að þau vildu það ekki. Grænn karl fór á loft hjá öllum fram­bjóð­endum nema Kol­brúnu Bald­urs­dóttur odd­vita Flokk fólks­ins og Sönnu Magda­lenu Mörtu­dóttur odd­vita Sós­í­alista­flokks­ins.

„Má sitja hjá?“ spurði Einar Þor­steins­son og upp­skar hlátur úr saln­um, en sneri svo grænum karli í átt að fund­ar­gestum og tók þar með undir með full­trúum allra fjög­urra meiri­hluta­flokk­anna, Sjálf­stæð­is­flokks­ins og Mið­flokks­ins, sem einnig sögð­ust vilja fækka bíla­stæð­unum í mið­borg Reykja­vík­ur.

Allir fulltrúar flokkanna settu græna karlinn á loft, spurðir hvort þeir teldu að Reykjavíkurborg ætti að beita sér fyrir því að bílaumferð í Reykjavík minnkaði.
Samtök um bíllausan lífsstíl

„En viljið þið útvíkka það svæði þar sem er rukkað fyrir stæð­i?“ spurði Gísli Mart­einn næst og þá sneri Einar spjald­inu yfir á rauðan karl og slóst þar með í hóp­inn með þeim Sönnu og Kol­brúnu. Aðrir full­trúar flokk­anna voru á grænu og því fylgj­andi því að borgin bætti við svæðum þar sem bíla­stæði eru gjald­skyld.

Full­trúar allra flokka sögð­ust sömu­leiðis sam­mála um það á fund­inum að Reykja­vík­ur­borg ætti að beita sér fyrir því að draga úr bíla­um­ferð í Reykja­vík. Og upp­skáru lófa­klapp úr saln­um.

Svo var það Borg­ar­línan

Nokkur tími fór í að ræða þetta stóra sam­göngu­verk­efni sem er hluti af sam­göngusátt­mála höf­uð­borg­ar­svæð­is­ins og felur í sér upp­bygg­ingu sér­rýmis undir stræt­is­vagna um höf­uð­borg­ar­svæð­ið. Spurn­ingin sem lögð var fyrir fram­bjóð­end­urna var sú hvort þeirra fram­boð væri „hlynnt Borg­ar­línu eins og er verið að skipu­leggja hana nún­a?“

Kjarn­inn tók saman svör fram­bjóð­end­anna við þess­ari spurn­ingu, í þeirri röð sem þau voru sett fram á fund­in­um.

Borgarlína

Kol­brún Bald­urs­dótt­ir, Flokki fólks­ins

„Mér þykir leið­in­legt hvað fólk er eitt­hvað ósátt við þetta verk­efni víða sem maður fer um borg­ina. En við erum flokkur sem hefur aldrei staðið upp og sagt að við viljum ekki Borg­ar­línu. Það væri ekki mjög skyn­sam­legt að segja það enda er þetta bara eitt­hvað sem er fram­tíðin að sjálf­sögðu. [...] Við myndum vilja skoða þetta verk­efni og kannski þarf að gera þetta eitt­hvað öðru­vísi.“

Sanna Magda­lena Mörtu­dótt­ir, Sós­í­alista­flokki

„Nei, af því að sam­kvæmt áætlun á fyrsti leggur að koma 2025 og þetta er kynnt þannig að þetta er lausnin sem við eigum að bíða eft­ir. Á meðan er ekk­ert að ger­ast í Strætómál­um, á meðan að það er að grotna niður get ég ekki stutt þessa útfærslu. [...] Til að leysa vand­ann núna þurfum við áreið­an­legar lausnir nún­a.“

Hildur Björns­dótt­ir, Sjálf­stæð­is­flokki

„Við viljum vinna áfram að sam­göngusátt­mál­an­um. [...] En mér finnst stundum eins og spurn­ingin „styður þú Borg­ar­línu eins og hún lítur út núna“ sé svo­lítið eins og spurn­ingin í Stellu í Orlofi: „Hver á þennan sum­ar­bú­stað, já eða nei?“ Við vitum ekki enn hver á að reka þetta eða hvað þetta kost­ar. [...] Við viljum svör við þessum spurn­ing­um, við erum aura­sálir í Sjálf­stæð­is­flokkn­um. [...] Við styðjum Borg­ar­línu, við viljum ekki útvatn­aða útgáfu en við viljum vita hver á að reka hana og hvern­ig. [...] Það er algjör­lega klárt að það liggur ekki fyrir hver á að taka reikn­ing­inn af rekstri Borg­ar­lín­u.“

Einar Þor­steins­son, Fram­sókn­ar­flokk­ur­inn

„Við erum með Borg­ar­línu, án fyr­ir­vara. [...] Mark­miðið er alveg á hreinu. Við ætlum að klára Borg­ar­línu og gera hana að besta almenn­ings­sam­göngu­kerfi í heimi. Það er bara frá­bært mark­mið og við eigum að vera stolt af því. Í grunn­inn þurfa sam­göngu­mál ekk­ert að vera eitt­hvað flokkspóli­tískt bit­bein. Við þurfum að taka til­lit til þarfa borg­ar­búa. [...] Ég styð Borg­ar­lín­una eins og hún er núna og ég treysti því að þetta ferli og næsta borg­ar­stjórn sem tekur við verk­efn­inu stýri því af ábyrgð þannig að það sé skyn­sam­lega haldið á spil­un­um.“

Pawel Bar­toszek, Við­reisn

„Við­reisn hefur bæði í borg­ar­stjórn og á þingi og í öllum sveit­ar­fé­lögum kosið með sam­göngusátt­mála þannig að við styðjum þessa hug­mynd um Borg­ar­línu eins og hún liggur fyr­ir. Innan þeirra marka má koma með ýmsar útfærslur og ég hef alltaf talað fyrir þeirri útfærslu sem gengur lengst hvað varðar gæði. Ég hef talað fyrir því að Suð­ur­lands­brautin ætti að verða ein akrein fyrir almenna bíla­um­ferð og ein akrein fyrir Borg­ar­línu. Ég hef talað fyrir því að Hverf­is­gatan ætti að verða fyrst og fremst fyrir Borg­ar­línu og mögu­lega ein­hverja stað­bundna umferð.“

Dóra Björt Guð­jóns­dótt­ir, Pírötum

„Ég styð þessar fyr­ir­ætl­anir um Borg­ar­línu að sjálf­sögðu en við myndum gjarnan vilja hraða Borg­ar­línu og svo er rosa mik­il­vægt að tryggja gæðin alla leið. Skipu­lags­málin eru ansi tækni­lega í eðli sínu og við höfum beitt okkur fyrir því að það sé allt hannað út frá sem mestum metn­aði, bæði hvað varðar Borg­ar­línu, skipu­lag­ið, götu­mynd­ina og ann­að. Við viljum metn­að­ar­fulla og góða Borg­ar­línu, ef eitt­hvað er, meiri Borg­ar­línu hrað­ar.“

Dagur B. Egg­erts­son, Sam­fylk­ingu

„Ég styð Borg­ar­línu, já. En mig langar aðeins bara að nefna, því að sumir hafa verið að kalla þetta „Borg­ar­línu borg­ar­stjóra“ eða „Borg­ar­línu Dags“. Þó það sé rosa­lega freist­andi fyrir ein­hvern í póli­tík að taka rosa mikið „kredit“ þá vil ég und­ir­strika að það eru tugir af okkar bestu sér­fræð­ingum sem hafa komið að útfærsl­unni og við höfum sótt teymi á heims­mæli­kvarða til að koma að hönn­un­inni. Þetta er svo mikið lyk­il­verk­efni fyrir fram­tíð borg­ar­innar að það hefur verið vandað alveg gríð­ar­lega mikið til verka og ég hef sann­færst um það að eftir því sem við höfum kraft og styrk í póli­tík­inni [...] til að hafa gæðin í hámarki, þeim mun betra verði verk­efn­ið.“

Ómar Már Jóns­son, Mið­flokki

„Ég styð bíl­lausan lífs­stíl. Byrjum þar. [...] Mér finnst allt í lagi að staldra aðeins við eftir kosn­ing­arnar og fara betur yfir sam­göngusátt­mál­ann. [...] Nei.“

Líf Magneu­dótt­ir, Vinstri grænum

„Ég styð þetta verk­efni heils­hugar og þakka bara fyrir að VG hafi verið í rík­is­stjórn þegar við gerðum þennan sam­göngusátt­mála. Það er alveg rétt sem Dagur seg­ir, verk­efni verða ekki til í tóma­rúmi, það er sam­vinna og það að við séum að róa öll í sömu átt sem gera krafta­verkin í bylt­ingu borg­ar­inn­ar.“

Skiptir Kjarninn þig máli?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Við erum til staðar fyrir lesendur og fjöllum um það sem skiptir máli.

Ef Kjarninn skiptir þig máli þá máttu endilega vera með okkur í liði.

Já takk, ég vil styrkja Kjarnann!
Meira eftir höfundinnArnar Þór Ingólfsson
Meira úr sama flokkiFréttaskýringar