Rannsaka ætluð brot eiganda Bræðraborgarstígs 1

Lögreglan á höfuðborgarsvæðinu er með til skoðunar ætlað brot fyrrum eiganda Bræðraborgarstígs 1 á byggingarreglugerð. HMS segir að eigandanum hafi borið að tryggja brunavarnir hússins og þær ekki reynst í samræmi við lög.

Rústir hússins að Bræðraborgarstíg 1 standa enn, yfir hálfu ári eftir að það brann.
Rústir hússins að Bræðraborgarstíg 1 standa enn, yfir hálfu ári eftir að það brann.
Auglýsing

Lögreglan á höfuðborgarsvæðinu er með til skoðunar ætlað brot fyrrum eiganda Bræðraborgarstígs 1 á byggingarreglugerð. Þetta staðfestir Hulda Elsa Björgvinsdóttir, sviðsstjóri ákærusviðs lögreglunnar, við Kjarnann.


Þrír létust í eldsvoða í húsinu 25. júní síðasta sumar, allt ungt fólk frá Póllandi. Tveir slösuðust alvarlega. Húsið var þá í eigu félagsins HD Verks en í byrjun janúar gengu kaup Þorpsins vistfélags á brunarústunum og á húsinu við hliðina í gegn. Eigandi HD Verks er Kristinn Jón Gíslason.

Auglýsing


Samkvæmt rannsókn bæði lögreglu og Húsnæðis- og mannvirkjastofnunar var eldur líklega kveiktur í húsinu á tveimur stöðum. Karlmaður á sjötugsaldri, sem var íbúi í húsinu, var í haust ákærður fyrir íkveikjuna, þrjú manndráp og tíu manndrápstilraunir. Samkvæmt mati geðlæknis var hann ósakhæfur á verknaðarstund en tveir yfirmatsmenn voru fengnir til að fara yfir geðmatið og liggur niðurstaða þeirra enn ekki fyrir. Dómstjóri Héraðsdóms Reykjavíkur hefur þó þegar ákveðið að þinghaldið verði opið en ekki lokað að hluta eða í heild líkt og verjandi mannsins fór fram á.


Rannsakendur Húsnæðis- og mannvirkjastofnunar telja að, óháð því hvort um íkveikju hafi verið að ræða, þá hafi fleiri samverkandi þættir haft áhrif á að eldsvoðinn varð jafn mannskæður og raun bar vitni. Um var að ræða yfir hundrað ára gamalt forskalað timburhús sem ekki var vel úr garði gert með tilliti til brunavarna í upphafi.


Í skýrslu stofnunarinnar um brunann, sem gefin var út um miðjan desember, kemur fram að upphaflegar teikningar liggi ekki fyrir, en nýjustu samþykktu teikningarnar af húsinu sé frá árinu 2000. „Þær brunavarnir sem þær teikningar gerðu ráð fyrir voru ekki til staðar þegar bruninn varð,“ segir í skýrslunni. Herbergjaskipan var líka önnur. Brunahólfun að stigahúsi var ekki til staðar né þau björgunarop sem voru á samþykktum teikningum. Eins hefur inngangi á 2. hæð hússins á einhverjum tímapunkti verið lokað með þeim afleiðingum að í stað tveggja flóttaleiða úr íbúðinni var bara ein flóttaleið. 

Eigandi ber ábyrgð á brunavörnum

Skýrsluhöfundar harma að lokaúttekt eftirlitsaðila sem fram fór á árinu 2000 hafi einungis tekið til 1. hæðar hússins þar sem dagvistunarheimili var rekið á þeim tíma en efri hæðir hússins voru ekki skoðaðar. Var því ekki hægt að fullyrða hvort efri hæðir hússins hafi á einhverjum tíma verið til samræmis við samþykktar teikningar. „Eigandi hússins á hverjum tíma bar ábyrgð á ástandi hússins, var skylt að sækja um tilskilin leyfi vegna breytinga á húsnæðinu og eins bar honum að tryggja viðunandi brunavarnir,“ segir í skýrslunni. Í henni kemur fram að notkun hússins var önnur en teikningar gerðu ráð fyrir og forsendur allt aðrar gagnvart brunaöryggi. Húsið var í raun notað til útleigu á herbergjum en ekki sem tvær íbúðir. Breytt notkun kallaði á auknar brunavarnir og eldvarnareftirlit.

Vasile Tibor Andor bjó á rishæðinni og varð innlyksa í eldhafinu. Hann sagði sögu sína og frá björguninni sem hér sést í viðtali við Kjarnann í nóvember. Mynd: Aðsend


Í ítarlegri umfjöllun Kjarnans um eldsvoðann og eftirmál hans, sem birt var í nóvember, sögðust íbúar sem rætt var við ekki hafa heyrt í reykskynjurum er eldurinn kviknaði. Þeir hefðu ekki orðið hans varir fyrr en þeir heyrðu öskur sambýlinga sinna.


Í skýrslu Húsnæðis- og mannvirkjastofnunar kom fram að aðeins einn reykskynjari hafi fundist í rústum hússins að Bræðraborgarstíg. Hann var án rafhlöðu. Niðurstaða stofnunarinnar á rannsókn brunans er m.a. sú að brunavörnum í húsinu hafi verið verulega ábótavant og ekki í samræmi við lög.


Brot á lögum um mannvirki og reglugerðum settum samkvæmt þeim varða sektum eða fangelsi allt að tveimur árum nema þyngri refsing liggi við samkvæmt öðrum lögum.


Bruninn á Bræðraborgarstíg er sá mannskæðasti sem orðið hefur í höfuðborginni.


Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Steinar Frímannsson
Hver er stefna stjórnmálaflokkanna í umhverfismálum?
Kjarninn 16. september 2021
Halldóra Mogensen, þingflokksformaður Pírata, í forystusætinu á RÚV í gærkvöldi.
Boðuð útgjaldaaukning Pírata er ekki fullfjármögnuð
Staðreyndavakt Kjarnans skoðar fullyrðingu Halldóru Mogensen um að kosningaloforð Pírata séu fullfjármögnuð með nýjum tekjuöflunarleiðum.
Kjarninn 16. september 2021
Jón Steindór Valdimarsson
Drifkraftur nýrra lausna í loftslagsmálum
Kjarninn 16. september 2021
Mikil skekkja er í útreikningum Pírata á helstu tekjuöflunarleiðinni sem flokkurinn sá fyrir að fjármagna kosningaloforð sín með.
Tugmilljarða skekkja í útreikningum Pírata á helstu tekjuöflunaraðgerð þeirra
Þingmaður Pírata segir að flokkurinn sé að endurskoða útreikninga sína á áhrifum 3,75 prósentustiga hækkunar efsta þreps tekjuskattskerfisins, eftir að bent var á að þar skeikaði tugmilljörðum.
Kjarninn 16. september 2021
Jóhann S. Bogason
Vesalings Færeyingarnir
Kjarninn 16. september 2021
Kolefnisgjald leggst meðal annars á bensín og dísil olíu.
Meirihluti stjórnmálaflokka vill hækka kolefnisgjald
Passa verður að kolefnisgjald leggist ekki þyngst á þau sem minnst hafa á milli handanna að mati þeirra flokka sem vilja hækka kolefnisgjald. Útblástur frá vegasamgöngum er helsta uppspretta losunar sem er á beinni ábyrgð Íslands.
Kjarninn 16. september 2021
Liðin tíð að Bandaríkin veiti Íslandi aðstoð „vegna góðvildar“
Íslendingar þurfa tromp á hendi til að vekja áhuga Bandaríkjanna til að styðja landið diplómatísk í alþjóðasamfélaginu og veita viðskiptalegar eða efnahagslegar ívilnanir, að því er fram kemur í þættinum Völundarhús utanríkismála Íslands.
Kjarninn 16. september 2021
Völunarhús utanríksmála Íslands
Völunarhús utanríksmála Íslands
Völundarhús utanríkismála Íslands – Þáttur 3: Áhugi Bandaríkjanna á Íslandi
Kjarninn 16. september 2021
Meira úr sama flokkiInnlent