Maðurinn sem grunaður er um að skjóta á bíl borgarstjóra úrskurðaður í gæsluvarðhald

Tveir menn eru með réttarstöðu sakbornings vegna skotárása á bíl Dags B. Eggertssonar og á skrifstofu Samfylkingarinnar.

Ritstjórn Kjarnans 30. janúar 2021

Dagur B. Eggertsson, borgarstjóri í Reykjavík.

Karlmaður um sextugt var í dag í Héraðsdómi Reykjavíkur úrskurðaður í gæsluvarðhald til 1. febrúar á grundvelli rannsóknarhagsmuna að kröfu Lögreglunnar á höfuðborgarsvæðinu.

Það er gert í þágu rannsóknar hennar á skemmdum sem voru unnar á bifreið Dags B. Eggertssonar, borgarstjóra í Reykjavík, og húsnæði Samfylkingarinnar nýverið.

Í tilkynningu frá lögreglu segir að rannsókn málsins miði vel, en annar karlmaður hefur einnig réttarstöðu sakbornings í málinu.

Kjarninn greindi frá því í vikunni byssukúlur hafi fundist í hurðinni á bíl í eigu fjölskyldu Dags B. Eggertssonar borgarstjóra um síðustu helgi.

Dagur sagði í viðtali við RÚV að það væri „höggvið ansi nærri manni þegar heimilið er annars vegar, því þar býr ekki bara ég heldur fjölskylda mín og krakkarnir“

Borgarstjóri sagðist í viðtalinu hafa tekið eftir skotgötum á fjölskyldubifreiðinni síðasta laugardag, er hann var að ganga inn í bílinn. Lögregla hafi síðan fengið bílinn í hendur, tekið hann til rannsóknar og fundið kúlur inni í hurðinni.

Dagur sagði enn fremur í viðtalinu að ekki liggi nákvæmlega ljóst fyrir hvenær skotið var á bílinn eða hvort bíllinn hafi þá staðið fyrir utan heimili hans. Þessir hlutir væru á meðal þess sem lögregla rannsaki nú.

Árásirnar hafa verið fordæmdar þverpólitískt.

Ólafur Guðmundsson varaborgarfulltrúi Sjálfstæðisflokksins, sem lét þau orð falla í athugasemdakerfi Vísis eftir að málið kom upp að borgarstjóri ætti að byrja á sjálfum sér, byltingin væri „komin heim“ og því ætti borgarstjórinn bara að taka, vék í gær úr þremur ráðum borgarinnar vegna orða sinna.

Ólafur mun ekki lengur vera varamaður í skipulags- og samgönguráði, öldungaráði og innkaupa- og framkvæmdaráði Reykjavíkurborgar. Þrátt fyrir það verður hann áfram varaborgarfulltrúi.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 341 Færslan birtist fyrst: 30. janúar 2021, kl. 16:02

Í upprunalegri útgáfu fréttarinnar sagði að maðurinn væri á fimmtugsaldri. Það var haft eftir tilkynningu frá lögreglu. Hún hefur nú leiðrétt þá tilkynningu og sagt að um mistök hafi verið að ræða. Maðurinn er á sextugsaldri. Fréttin var uppfærð í samræmi við þetta.