„Við höfum gefið út að við ráð­leggjum óbólu­settum ekki að ferð­ast og gildir það í raun einnig um börn,“ segir Þórólfur Guðna­son sótt­varn­ar­læknir spurður hvort að óhætt sé að ferð­ast til útlanda með börn um þessar mund­ir. Hann segir þessar ráð­legg­ingar gilda um ferða­lög til allra landa nema Græn­lands.

Ráð­legg­ing­arnar sem Þórólfur vísar í er að finna á vefnum COVID.is og eru eft­ir­far­andi: „Íbúum Íslands er ein­dregið ráðið frá ónauð­syn­legum ferða­lögum til áhættu­svæða vegna COVID-19 nema vera full bólu­sett.“ Þar sem ekki er almennt farið að bólu­setja börn yngri en sextán ára á Íslandi eiga þessi var­úð­ar­orð einnig við um þau – ekki aðeins full­orðna ein­stak­linga.

Börn fædd árið 2005 eða síðar þurfa að fara í sýna­töku á landa­mærum við kom­una til lands­ins en eru, ólíkt því sem almennt á við full­orðna óbólu­setta ein­stak­linga, und­an­þegin skyldu til að fram­vísa nei­kvæðu PCR-vott­orði (COVID-­prófi) við komu. Mis­jafnt er hvernig þessu fyr­ir­komu­lagi er háttað í öðrum lönd­um.

„Fólk sem ferð­ast þarf að gæta að sýk­inga­vörnum fyrir sig, hvort sem það er bólu­sett eða óbólu­sett, og sín börn,“ segir Þórólfur við Kjarn­ann. „Það eiga allir að vita hvaða sýk­inga­varnir þetta eru.“

Öllum sextán ára og eldri sem búsettir eru á Íslandi býðst að fara í bólu­setn­ingu gegn COVID-19. Mikil umræða er nú víða um lönd um hvort og þá hvenær eigi að hefja bólu­setn­ingu barna. Dönsk stjórn­völd hafa til að mynda ákveðið að bólu­setn­ing meðal 12-15 ára hefj­ist síðar á þessu ári. „Það hefur ekki verið tekin ákvörðun um almenna bólu­setn­ingu barna,“ svarar Þórólfur aðspurður um stöðu þessa máls á Íslandi.

Bólu­setn­ing barna með und­ir­liggj­andi sjúk­dóma á aldr­inum 12-15 ára er hafin og hafa 322 ein­stak­lingar í ald­urs­hópnum fengið fyrri skammt bólu­efn­is.