Fagnað í Hljómskálagarðinum – Rigningin stöðvaði ekki aðdáendur íslenska landsliðsins
Íslenska landsliðið í fótbolta gerði jafntefli við Argentínu fyrr í dag og er ekki ofsögum sagt af því að Íslendingar hafi fagnað með ákefð þeim úrslitum út um allt land og á samfélagsmiðlum. Ljósmyndari Kjarnans leit við í Hljómskálagarðinum á meðan leik stóð og tók púlsinn á stemningunni.
Þrátt fyrir að hellidemba hafi verið á höfuðborgarsvæðinu í dag þegar íslenska landsliðið mætti Argentínu í sínum fyrsta leik á Heimsmeistaramótinu í knattspyrnu í Rússlandi þá hafði það ekki áhrif á þá fjölmörgu sem lögðu leið sína í miðbæinn til að horfa á leikinn. Gríðarleg stemning var í Hljómskálagarðinum þegar ljósmyndari Kjarnans gekk um svæðið og ekki var að sjá að áhorfendur létu rigninguna á sig fá.
Mikill fjöldi var saman kominn í Hljómskálagarðinum en leikir Íslands eru sýndir víða um höfuðborgarsvæðið og um land allt.
Eins og flestir vita þá gerðu Ísland og Argentína 1-1 jafntefli. Alfreð Finnbogason skoraði mark Íslands en Sergio Aguero mark Argentínu. Hannes Þór Halldórsson varði glæsilega víti frá stórstjörnunni Lionel Messi, sem íslenska liðið lokaði nær alveg á með mögnuðum og vel skipulögðum varnarleik.
![](http://kjarninn.overcastcdn.com/images/DSC06650_njhgr.2e16d0ba.fill-721x405-c100.jpg)
![](http://kjarninn.overcastcdn.com/images/DSC06718.2e16d0ba.fill-721x405-c100.jpg)
Búið var að setja upp bása þar sem hægt var að kaupa veitingar, sælgæti og fleira. Á svæðinu voru einnig hoppukastalar og fótboltavöllur en Reykjavíkurborg hefur veitt Prikinu leyfi fyrir sölu áfengis í Hljómskálagarðinum vegna leikja Íslands sem þar verða sýndir.
Sjá mátti á risaskjáinn hvar sem fólk stóð og höfðu margir nælt sér í regnhlífar og slár til að skýla sér fyrir rigningunni.
Fólk var á öllum aldri og af báðum kynjum saman komið. Margir voru málaðir í framan við tilefnið og máttu litir íslenska fánans njóta sín. Þeir fullorðnu voru ekki síður spenntir en börnin og mátti heyra söng og trommuleik til skiptis.
![](http://kjarninn.overcastcdn.com/images/DSC06759.2e16d0ba.fill-570x320-c100.jpg)
![](http://kjarninn.overcastcdn.com/images/DSC06837.2e16d0ba.fill-570x320-c100.jpg)
![](http://kjarninn.overcastcdn.com/images/DSC06677.2e16d0ba.fill-570x320-c100.jpg)
Þegar líða fór að leikslokum og staðan enn 1-1 þá mátti finna spennuna magnast meðal áhorfenda. Skyldi íslenska liðið ná að halda hreinu í þessar mínútur sem eftir eru?
Þegar dómarinn flautaði til leiksloka brutust fagnaðarlætin út enda verður ekki annað sagt en að þetta sé glæsilegur árangur hjá strákunum – að gera jafntefli við eitt sterkasta lið í heimi í fyrsta leiknum á HM.
Til hamingju með jafnteflið ... sigurinn!
Lesa meira
-
18. júlí 2018Sparkvarpið – HM uppgjör Sparkvarpsins: Þessir Frakkar eru engir krakkar lengur
-
15. júlí 2018Frakkar heimsmeistarar - Öruggur sigur á Króatíu
-
15. júlí 2018Stóra stundin runnin upp - Hverjir eru bestir í heimi?
-
14. júlí 2018Besti árangur Belga sem taka bronsið heim af HM
-
11. júlí 2018Króatar mæta Frökkum í úrslitaleik HM
-
11. júlí 2018Fer fótboltinn „heim“ til Englands eða eru allir að vanmeta Króatana?
-
10. júlí 2018Thierry Henry og Belgar gegn Frakklandi - Grannaslagur í undanúrslitaleik HM
-
6. júlí 2018Sparkvarpið – Hápunktar og lágpunktar hingað til á HM í Rússlandi
-
1. júlí 2018HM og ég
-
1. júlí 2018Hannes Halldórsson – Markmaðurinn sem hagfræðingar elska