Rúmlega helmingslíkur eru á því að meirihluti Samfylkingar, Pírata, Vinstri grænna og Viðreisnar haldi velli í borgarstjórnarkosningum dagsins, samkvæmt nýjustu og um leið síðustu kosningaspá Kjarnans og Dr. Baldurs Héðinssonar fyrir kosningarnar. Framsóknarflokkurinn mælist nú í fyrsta skipti með fjóra fulltrúa inni í borgarstjórn.
Samhliða kosningaspánni er einnig keyrð sætaspá. Hún er framkvæmd þannig að keyrðar eru 100 þúsund sýndarkosningar miðað við fylgi flokka í kosningaspánni. Í hverri þeirra er úthlutað 23 borgarfulltrúum og þar sem sýndarkosningarnar eru allar með innbyggða óvissu þá getur fylgi flokka í hverri einstakri sýndarkosningu stundum verið hærra og stundum lægra, þótt meðaltal kosninganna allra sé það sama og kom fram í kosningaspánni.
Sætaspáin sýnir meirihlutann fallinn
Þegar líkur einstakra frambjóðenda flokkanna á því að komast inn eru teknar saman teiknast upp sú mynd að Píratar fá þrjá menn kjörna en ekki fjóra eins og þegar sætaspáin var keyrð fyrr í vikunni. Þá sekkur meirihlutinn niður í ellefu fulltrúa, þar sem bæði Viðreisn og Samfylking tapa einum borgarfulltrúa samkvæmt niðurstöðunum. Hægt er að sjá sætaspánna hér að neðan:
>99%Dagur B. Eggertsson
>99%Heiða Björg Hilmisdóttir
>99%Skúli Þór Helgason
99%Sabine Leskopf
92%Hjálmar Sveinsson
68%Guðný Maja Riba
33%Sara Björg Sigurðardóttir
>99%Hildur Björnsdóttir
>99%Ragnhildur Alda María Vilhjálmsdóttir
>99%Kjartan Magnússon
92%Marta Guðjónsdóttir
70%Björn Gíslason
35%Friðjón R. Friðjónsson
>99%Einar Þorsteinsson
98%Árelía Eydís Guðmundsdóttir
86%Magnea Gná Jóhannsdóttir
51%Aðalsteinn Haukur Sverrisson
17%Þorvaldur Daníelsson
>99%Dóra Björt Guðjónsdóttir
97%Alexandra Briem
83%Magnús Norðdahl
47%Kristinn Jón Ólafsson
87%Sanna Magdalena Mörtudóttir
47%Trausti Breiðfjörð Magnússon
11%Andrea Jóhanna Helgadóttir
82%Þórdís Lóa Þórhallsdóttir
39%Pawel Bartoszek
69%Kolbrún Baldursdóttir
18%Helga Þórðardóttir
67%Líf Magneudóttir
22%Stefán Pálsson
36%Ómar Már Jónsson
Samfylkingin verður stærsti flokkurinn í borgarstjórn samkvæmt kosningaspánni og mælist nú með 23,9 prósent fylgi og sex borgarfulltrúa. Sjálfstæðisflokkurinn kemur næstur þar á eftir, með 20,4 prósent fylgi, rúmum tíu prósentum minna en flokkurinn fékk í kosningunum árið 2018. Það myndi skila flokknum fimm borgarfulltrúum.
Framsóknarflokkurinn mælist svo með 14,8 prósent, sem myndi skila fjórum borgarfulltrúum til flokksins. Flokkurinn á engan borgarfulltrúa í dag eftir að hafa fengið 3,2 prósent atkvæða í kosningunum árið 2018, er boðinn var fram B-listi undir merkjum Framsóknar og flugvallavina.
Píratar dala ögn frá síðustu kosningaspá og mælast nú með 14,4 prósent fylgi og þrjá fulltrúa í borgarstjórn. Sú niðurstaða yrði þó nokkur sigur fyrir flokkinn, sem fékk 7,7 prósent atkvæða í borgarstjórnarkosningunum 2018.
Þéttur pakki í neðri hlutanum
Töluvert bil er síðan niður í aðra flokka. Sósíalistaflokkurinn yrði fimmti stærsti flokkurinn samkvæmt kosningaspánni með 7 prósent fylgi og bætir við sig borgarfulltrúa sem áður segir, en Viðreisn dalar nokkuð og mælist nú með 6,3 prósenta fylgi, sem myndi þýða að Pawel Bartoszek formaður skipulags- og samgönguráðs borgarinnar kæmist ekki inn í borgarstjórn að nýju.
Flokkur fólksins mælist með 4,8 prósenta fylgi sem myndi skila Kolbrúnu Baldursdóttur aftur inn í borgarstjórn og Vinstri græn yrði minnsti flokkurinn í borgarstjórn Reykjavíkur ef spáin gengi eftir, en flokkurinn mælist nú með 4,6 prósenta fylgi, sem dugir til þess að halda Líf Magneudóttur inni í borgarstjórn.
Fylgi Miðflokksins mælist 2,6 prósent samkvæmt kosningaspánni, sem myndi ekki duga til þess að ná oddvitanum Ómari Má Jónssyni inn í borgarstjórn. Samanlagt fylgi Ábyrgrar framtíðar og Reykjavíkur, bestu borgarinnar mælist nú 1,2 prósent og mun hvorugur flokkurinn ná að setja mark sitt á borgarmálin verði það niðurstaðan.
85 prósent líkur á að hægt verði að mynda meirihluta S, B og P
Þegar kosningaspáin var keyrð í upphafi vikunnar var ekki útlit fyrir að mikil spenna yrði um hvort meirihlutinn í borginni héldi eða ekki, en sú staða hefur heldur betur breyst í ljósi síðustu kannana.
Samkvæmt keyrslu 100 þúsund sýndarkosninga eru nú 54 prósent líkur á að þeir fjórir flokkar sem meirihlutann mynda nái 12 borgarfulltrúum á ný.
Meiri líkur eru á því að hægt yrði að mynda meirihluta þar sem Sósíalistaflokkurinn kæmi inn fyrir Viðreisn, eða 59 prósent. Einnig eru sem fyrr miklar líkur á því að Samfylkingin, Framsókn og Píratar gætu myndað þriggja flokka meirihluta en þær eru nú 85 prósent, eða á svipuðu reki og þær hafa verið í vikunni.
Enn er vandséð hvaða leið Sjálfstæðisflokkurinn á að finna til valda í Reykjavík, samkvæmt kosningaspánni, en ef hún yrði fær yrði hún í gegnum samstarf við Framsókn og einn til tvo flokka til viðbótar.
Nú eru 31 prósent líkur á því að Sjálfstæðisflokkur, Framsókn, Flokkur fólksins og Viðreisn gætu náð nægilegum fjölda fulltrúa til að geta unnið saman og 13 prósent líkur eru á því að Sjálfstæðisflokkur, Viðreisn og Framsókn gætu náð meirihluta. Tveggja prósenta líkur eru á að Sjálfstæðisflokkur og Framsókn nái tólf fulltrúum samanlagt.
Það skal þó ekki útiloka að Sjálfstæðisflokkurinn fái meira upp úr kjörkössunum en kannanir undanfarinna daga hafa verið að sýna, en eins og kom fram í umfjöllun Kjarnans í gær hefur Sjálfstæðisflokkurinn á síðustu árum oft verið vanmetinn í kosningum og það gerðist líka í borginni árið 2018 – þá var kjörfylgi flokksins rúmum þremur prósentustigum meira en síðasta kosningaspá Kjarnans og Baldurs Héðinssonar sagði til um.
Kannanir í nýjustu kosningaspá fyrir borgarstjórnarkosningar 14. maí:
- Skoðanakönnun Prósent 4. – 9. maí (15,8%)
- Skoðanakönnun Maskínu 6. – 11. maí (17,1%)
- Þjóðarpúls Gallup 9. – 13. maí (37,0%)
- Skoðanakönnun Maskínu 12. – 13. maí (30,1%)
Hvað er kosningaspáin?
Fyrir hverjar kosningar um allan heim birta fjölmiðlar gríðarlegt magn af upplýsingum. Þessar upplýsingar eru oftar en ekki tölfræðilegar, byggðar á skoðanakönnunum þar sem fólk hefur verið spurt hvernig það upplifir stjórnmálin og hvað það getur ímyndað sér að kjósa. Stjórnmálafræðingar og fjölmiðlar keppast svo við að túlka niðurstöðurnar og veita almenningi enn meiri upplýsingar um stöðuna í heimi stjórnmálanna.
Allar þessar kannanir og allar mögulegar túlkanir á niðurstöðum þeirra kunna að vera ruglandi fyrir hinn almenna neytanda. Einn kannar skoðanir fólks yfir ákveðið tímabil og annar kannar sömu skoðanir á öðrum tíma og með öðrum aðferðum. Hvor könnunin er nákvæmari? Hverri skal treysta betur? Svarið er oftar en ekki óljóst því vandinn er að hinn almenni kjósandi hefur ekki forsendur til að meta áreiðanleika hverrar könnunar.
Lestu meira um komandi kosningar:
-
21. desember 2022Kosningastjóri Samfylkingarinnar nýr aðstoðarmaður borgarstjóra
-
3. nóvember 2022Framsókn og Vinstri græn hafa tapað um átta prósentustigum af fylgi frá síðustu kosningum
-
31. ágúst 2022Vegglistaverk Libiu og Ólafs þótti óleyfilegur kosningaáróður í Hafnarfirði
-
20. ágúst 2022Laun 30 dýrustu bæjarstjóranna voru samtal 698 milljónir króna í fyrra
-
12. ágúst 2022Hildur varði 9,3 milljónum í prófkjörsslaginn og átti eina og hálfa milljón afgangs
-
11. ágúst 2022Hildur skilaði uppgjöri vegna prófkjörs í gær
-
6. júlí 2022Vigdís Hauksdóttir vill verða bæjarstjóri
-
18. júní 2022Flokkurinn sem útilokaði sjálfan sig
-
8. júní 2022Dagur ógnar
-
7. júní 2022Næstum fjórum af hverjum tíu kjósendum Framsóknar líst illa á samstarfið í borginni
